Biskup Íslands hefur sent okkur bænarorð sem við skullum sameinast um af einum huga.

Heilagi Guð. Uppspretta lífsins og lind kærleikans.

Frammi fyrir hörmungum ógæfuverkanna í París komum við fram fyrir þig og biðjum þig um styrk og kraft. Blessa þau sem eiga um sárt að binda.  Opna með kærleika þínum hjörtu mannanna  og  lát þitt heilaga ljós leysa upp ótta, hatur og vonsku meðal mannanna.

Leiðbein í speki þinni þeim öllum sem ábyrgð bera á stríði og ofbeldi, hatri og mannvonsku. Gef þeim vilja til að hugsa ráð sitt og kraft til að snúa af vegi sínum.

Blessa þau sem nú vilja bregðast við, stjórnvöld og almenning, og hjálpa þeim að finna innri frið svo þau megi bregðast við friðsamlega og af yfirvegun.

Gef okkur öllum  náð til þess að finna og skilja  að friðurinn hefst hjá okkur sjálfum og að aðeins kærleiksríkur hugur og sáttavilji  geta tryggt frið í heiminum og líf á jörðu.  Fyll huga okkar, tilfinningar og  gjörðir með kærleika þínum og  trausti til þinnar voldugu nærveru. Ver börnum þínum öllum nálægur í heilögum anda nú og ævinlega, fyrir Jesú Krist Drottin vorn. Amen.