Hin ástsæla leikkona Edda Björgvinsdóttir flytur hátíðarræðu á aðventuhátið.

Aðventuhátíð fyrir Oslóarsvæðið verður að þessu sinni haldin í Høvik kirkju, Sandviksveien 11, 1363 Sandvika, fyrsta sunnudag í aðventu (29.nóvember) kl.14. Listanefnd safnaðarins í samstarfi við Ískórinn hefur sett saman metnaðarfulla dagskrá með stórsöngvurum og strengjasveit.  Klassískar tónlistarperlur fylla dagskrána í flutningi einsöngvaranna Dóru Steinunnar Ármannsdóttur, Margrétar Brynjarsdóttur Daníels Daníelssonar og Eyjólfs Eyjólfssonar ásamt Ískórnum.  Þröstur Eiríksson kantor mun leika á orgelið. Konsertmeistari er Hjörleifur Valsson.

Formaður safnaðarins Arnar Páll Michelsen setur hátíðina að venju með ávarpi. Bæna- og blessunarorð með friðaróskum verða á sínum stað.

Fermingarbörnin tendra fyrsta kertið á aðventukransinum  og sunnudagaskólinn og krakkahornið verður á sínum stað fyrir yngstu börnin.

Að venju sér Íslendingafélagið um kirkjukaffi á eftir í safnaðarheimilinu.

Takið fyrsta sunnudag í aðventu frá, sunnudaginn 29.nóvember kl.14.

Verið hjartanlega velkomin.

Listanefnd Íslenska safnaðarins í Noregi