Íslenski söfnuðurinn í Noregi

Verið velkomin í Ålesund kirkju sunnudaginn 25.mars kl.15. Kveikt verður minningarljós fyrir látna sjómenn. Börnin eru sérstaklega boðin velkomin og fá þau sunnudagaskólann á DVD "Daginn í dag. Safnaðarstjórn íslenska safnaðarins mætir og hittir kirkjugesti. Sr. Þráinn Haraldsson prestur við Ålesund kirkju og Sr. Arna Gretarsdottir þjóna. Verið hjartanlega velkomin.

Æskulýðsfélag íslenska safnaðarins ætlar miðvikudaginn 21. mars kl. 17.00 að halda sinn fyrsta æskulýðsfund.

Verður hann haldinn í Nordberg kirke (Kringsjågrenda 1, 01861 Oslo) og er fyrir alla unglinga á aldrinum 13-15 ára á Óslóar svæðinu.

Lofað verður miklu fjöri sem leiðtogarnir Siggi og Bogi munu halda uppi! Boðið verður upp á leiki og fjör, veitingar ofl. skemmtilegt.

Hlökkum til að sjá sem flesta.

Hægt er að fá sálgæsluviðtöl hjá Maríu Gunnarsdóttur prestsnema á mánudögum kl. 10:00-15:00 í mars og apríl.

Tímar bókaðir á skrifstofu safnaðarins, sími: 22360140.

Laugardaginn 10.mars kl.14 verður fjölskylduguðsþjónusta í Nordberg kirkju. Sunnudagaskólaleiðtogarnir hafa umsjón með stundinni ásamt sr. Örnu sem verður með gítarinn með í för.

Sunnudaginn 11.mars kl.14 verður fjölskylduguðsþjónusta í Sælen kirkju í Fyllingsdalen. Börn borin til skírnar og Íslendingakórinn í Bergen syngur. Ingibjartur Jónsson er organisti. Helga og sr. Arna hafa umsjón með stundinni.

Íþróttaálfurinn verður sérstakur gestur og lagt verður út frá 1.Kór.9.24-27.

Verið hjartanlega velkomin.

Verið hjartanlega velkomin til messu í Nordberg kirkju í Ósló sunnudaginn 4.mars n.k. kl.14. Ískórinn syngur af sinni alkunnu snilld og María Gunnarsdóttir guðfræðinemi predikar. Altarisganga. Sunnudagaskólinn á sama tíma. Kaffi og kræsingar að messu lokinni. Fermingarbörnin aðstoða við helgihaldið. Hlakka til að sjá ykkur. Arna prestur.

Sunnudaginn 19.febrúar  kl.16 verður fjölskylduguðsþjónusta í Geilo kulturkyrke (nýju kirkjunni í Geilo). Söngur, leikur og sprell. Öllu varpað á skjá. Allar fjölskyldur fá geisladiskinn "Daginn í dag" að gjöf frá söfnuðinum. Að stundinni lokinni verður boðið upp á pizzupartý. Umsjón hafa Sakarías Ingólfsson og sr. Arna Grétarsdóttir prestur safnaðarins. Að sjálfsögðu eru allir Íslendingar og þeirra fólk velkomið til kirkju.